Jukwaa la Wanawake Lazinduliwa Rasmi Wilayani Bunda

Posted on: July 20th, 2017

Mgeni rasmi katika uzinduzi wa Jukwaa la Wanawake Wilayani Bunda, Mhe. Lidya Bupilipili (Mkuu wa Wilaya ya Bunda) amezindua Jukwaa la Wanawake Wilayani hapa lenye lengo la kuwaunganisha Wanawake katika kujitambua, kutambua fursa zinazowazunguka, kujua namna ya kutumia fursa hizo katika kujiletea maendeleo endelevu na hivyo kuhakikisha kuwa malengo ya 50/50 yanatimia ifikapo 2030. 

Pamoja na mambo mengine, Jukwaa hili lilijikita zaidi katika kuwakutanisha wanawake ili waweze kujadiliana juu ya fursa za kiuchumi, changamoto zinazowakabili, kuongeza uelewa katika sekta ya uchumi, biashara, upatikanaji wa mitaji, uelewa wa sheria za nchi katika masuala yahusuyo uchumi na jinsi ya kujitegemea kiuchumi. Wajumbe wa jukwaa hilo walikuwa ni pamoja na: Watumishi wa Halmashauri na Taasisi zingine za umma, Taasisi za kijamii, Asasi za kidini, taasisi za kibiashara, Taasisi za kifedha na Wahisani wa nchi marafiki.

Jukwa hilo pia, liliweza kufanya uchaguzi wa viongozi wake ambao ni pamoja na Mwenyekiti, Makamu Mwenyekiti na Katibu wa Jukwaa. Uongozi huu utadumu kwa muda wa Miaka 3 ambapo halmashauri itakuwa na jukumu la kuhakikisha kuwa jukwaa linakutana kila baada ya miezi sita (6).