WATU WENYE ULEMAVU HALMASHAURI YA WILAYA YA BUNDA WASISITIZWA KUCHANGAMKIA FURSA YA MIKOPO.

Posted on: November 7th, 2024

Afisa ustawi wa jamii wa Halmashauri ya Wilaya ya Bunda Bi.Maria John amewataka watu wenye ulemavu katika kata ya Nyamanguta, Ketare na Kata ya Nyamuswa  kuunda  vikundi  ili waweze kupata mikopo inayotolewa na Halmashauri ya Wilaya ya Bunda  itakayowasaidia kujikwamua kiuchumi.

Ameyasema  hayo  katika ziara ya kuwatembelea watu wenye ulemavu ndani ya Halmashauri ya Wilaya ya Bunda iliyofanyika siku ya tarehe 7/11/2024  huku lengo kuu likiwa ni kutoa Elimu ya kupinga ukatili wa kijinsia kwa watu walemavu na kubaini changamoto inayopelekea  watu wenye ulemavu kushindwa kujitokeza kuomba mikopo  hiyo.

Hata hivyo amesema kuwa   mikopo inayotolewa na Halmashauri ya Wilaya ya Bunda imegawanyika katika makundi matatu ambayo ni kundi la wanawake, kundi la vijana  pamoja na kundi la watu wenye ulemavu, lakini mpaka sasa kundi la watu wenye Ulemavu hawajajitokeza kuomba mikopo hiyo.

"Mwisho wa maombi ya mikopo kwa robo ya kwanza ili kuwa  tarehe 31/10/2024 lakini watu wenye ulemavu hawajajitokeza kuomba  mikopo hiyo na pesa zenu zipo, sasa  tunatamani tufahamu  shida ni nini  hasa au hamuhitaji mikopo hiyo,na niwakumbushe  tu kuwa mkichukua mkopo  itawasaidi kujikwamua kiuchumi na kuepuka  kuwa  tegemezi"Amesema Afisa ustawi wa jamii

Kwa upande   wake   Afisa Maendeleoya Jamii Ndugu Justin Mtopwa ametoa Elimu ya namna sahihi ya kuomba  mikopo  hiyo na sifa zinazohitajika kwa waombaji  wa  mikopo hiyo,huku  akiwasisitiza  watu wenye ulemavu kujitokeza kuomba  mikopo  kwani  itawasaidia  kuinua  uchumi  wa  vikundi  na mtu mmoja mmoja.

Mwenyekiti wa Chama cha Watu wenye UlemavuTanzania  katika  Halmashauri  Wilaya ya Bunda Ndugu Sabasaba  Mseveni  Haji amewahimiza  watu wenye ulemavu  kujitokeza  kushiriki  uchaguzi  wa vyama  vya  watu wenye Ulemavu utakao  fanyika  tarehe 15 mwezi huu 2024 ili waweze kuchagua  viongozi  sahihi watakao  tetea  haki za watu wenye Ulemavu.

"Tunashindwa kupata haki zetu kwa sababu hatuna viongozi wanao tutetea hivyo niwaombe kujitokeza kushiriki uchaguzi  wa vyama  vya  walemavu  lakini pia tujitokeze  kugombea  na kupiga kura katika uchaguzi wa serikali za mitaa 2024 ili tupate wawakilishi  sahihi watakao tusimamia vyema" Amesema Sabasaba

Hata hivyo uchaguzi wa vyama vya watu wenye Ulemavu   utafanyika  katika ngazi  ya  Halmashauri  na Wilaya na  utawahusisha  watu  wenye ulemavu wa Viungo peke yao.