WASIMAMIZI WASAIDIZI WA UCHAGUZI 2024 HALMASHAURI YA WILAYA YA BUNDA WAFUNDWA.

Posted on: November 23rd, 2024

Wasimamizi wasaidizi wa  vituo vya kupigia kura katika Uchaguzi wa Serikali za Mitaa   ngazi ya vijiji na vitongoji  unaotarajia kufanyika tarehe 27/11/2024 katika Halmashauri ya Wilaya ya Bunda wameapishwa na kupewa mafunzo ya kanuni,  maadili, taratibu na Sheria  za usimamizi wa uchaguzi.

Uapisho huo umefanywa na Msimamizi wa Uchaguzi wa  Halmashauri ya Wilaya ya Bunda Bw.George S.  Mbilinyi siku ya tarehe 23/11/2024 katika ukumbi wa   Chuo cha Walimu Bunda.

Sambamba na hayo Bw.Mbilinyi amewataka wasimamizi hao kuhakikisha wanatekeleza zoezi hilo kwa usahihi na kuufanya uchaguzi kuwa wa huru na haki  huku akisisitiza umuhimu wa kufuata taratibu na kanuni ili kuepusha sintofahamu zinazoweza  kujitokeza.

"Mawasiliano katika shughuli yoyote ambayo tunakwenda kufanya ni muhimu sana ukiona kuna vitu huvielewi ni muhimu kuwasiliana na viongozi ili kuhakikisha tunaweka mambo sawa kwahiyo naomba kila mtu kuheshimu mawasiliano ni jambo la kawaida, lakini ni muhimu sana kwenye kazi tunayoenda kuifanya, kitu kingine nyie siyo wasemaji wa uchaguzi endapo mtu atakuja kuuliza jambo lolote kuhusu uchaguzi mwambie awasiliane na mimi"Amesema Msimamizi wa Uchaguzi.

Kwa upande wake Mwezeshaji wa Mafunzo hayo,  Ndugu Morris Johnson  amesema ni vyema kwa wasimamizi wa vituo vya kupiga  kura kujua taratibu za kupiga kura ambazo zinapatikana katika kanuni za kupiga  kura kuanzia kanuni  namba 31 hadi 37, na kuongeza kuwa vituo vya kupigia kura siku ya tarehe 27 mwezi 11 mwaka 2024 vitafunguliwa rasmi kuanzia muda wa saa mbili kamili asubuhi na kufungwa saa kumi kamili jioni.

“Niwakumbushe kuwa baada ya mtu yeyote kupiga kura hatarusiwa kubaki kwenye eneo la kituo cha kupigia kura isipokuwa anarusiwa kukaa umbali wa mita 100 kutoka kilipo kituo cha kupigia kura lakini pia tuzingatie usalama wa mpiga kura na usiri kwa mpiga kura”Amesema Ndugu Johnson.

Kwa uapande wao Wasimamizi Wasaidizi wa Uchaguzi wa Serikali za Mitaa 2024 wamesema mafunzo hayo yatawasaidia katika hatua zote za uchaguzi kuanzia zoezi la kupiga kura hadi kutangaza matokea ya uchaguzi na kuhakikisha uchaguzi unafanyika kwa ufanisi na kufuata sheria.