HALMASHAURI YA WILAYA YA BUNDA, YAPONGEZWA KWA UKAMILISHAJI WA JENGO LA MIONZI

Posted on: April 8th, 2024

Halmashauri ya Wilaya ya Bunda imepongezwa kwa ukamilisha wa jengo la mionzi katika Hospitali ya Wilaya, iliyopo katika kijiji cha Bukama, Kata ya Nyamuswa. Pongezi hizo zilitolewa na Mkurugenzi kutoka Ofisi ya Rais TAMISEMI, anayesimamia masuala ya Afya, Ustawi wa Jamii na Lishe, Daktari Rashid Mfaume siku ya tarehe 5/4/2024, wakati wa ziara yake ya kutembelea na kukagua miradi ya Afya inayotekelezwa katika Halmashauri ya Wilaya ya Bunda.

Daktari Mfaume alisema, kwa hili tunahaki ya kumpongeza Mh. Rais Dkt Samia Suluhu Hassan, kwa kutuletea vifaa vizuri na vya kisasa katika hospitali yetu ya Wilaya, na kutuletea fedha kwa ajili ya kujenga  jengo hili zuri la mionzi mahali hapa.

Ndugu Andrew Makaza, ambaye ni Mzee wa kijiji cha Bukama alimshukuru Mh. Rais kwa kuwezesha ujenzi wa jengo la mionzi na kuleta vifaa vya kisasa katika hospitali ya Wilaya kwani itawasaidia sana kuweza kupata matibabu karibu, tofauti na hapo awali huduma za mionzi walikuwa wanazifuata mbali na maeneo yao.

Naye, Mkurugenzi Mtendaji wa Halmashauri ya Wilaya ya Bunda, Bw. George S. Mbilinyi alimshukuru Mkurugenzi wa OR-TAMISEMI, pamoja na msafara alioongozana nao kwa kuja kutembelea na kukagua hospitali, aliahidi kuzifanyia kazi changamoto zote zilizobainishwa wakati wa ziara akishirikiana na Menejimenti ya Halmashauri kuona ni namna gani wataziondoa changamoto hizo.