WALIMU WAKUU WATWAA UBINGWA WA BAO 2-1 DHIDI YA WATUMISHI WA MAKAO MAKUU, KATIKA HALMASHAURI YA WILAYA YA BUNDA

Posted on: July 15th, 2024

Walimu Wakuu wa Halmashauri ya Wilaya ya Bunda watwaa ubingwa wa bao 2-1 dhidi ya Watumishi wa Makao Makuu, katika mechi iliyochezwa siku ya tarehe 13/7/2024 katika uwanja wa shule ya msingi Mwibara.

Katika mechi hiyo Mkurugenzi Mtendaji wa Halmashauri ya Wilaya ya Bunda Ndugu George S. Mbilinyi ambaye,alikuwa mgeni rasmi katika mechi hiyo alizipongeza timu zote mbili kwa kuweza kushiriki mechi, ikiwa ni kwa ajili ya kujenga ushirikiano na mahusiano mazuri baina ya watumishi wote wa Halmashauri ya Wilaya ya Bunda.

Ndugu Mbilinyi alisema, nimefurahi sana leo mbali ya kuwa mgeni rasmi katika mechi hii pia, nitashiriki katika kulisakata kabumbu, michezo ni afya na ni ajira, hivyo inatubidi tuongeze juhudi zaidi katika kufanya mazoezi ya mara kwa mara.

Mgeni rasmi alimuagiza Afisa Michezo, Utamaduni na Sanaa wa Halmashauri ya Wilaya ya Bunda Ndugu Eustace C. Kabwogi kuhakikisha anaandaa mechi kama hizi mara kwa mara kwani zinaongeza mahusiano na ushirikiano baina ya watumishi.

“Leo isiwe mwisho kwa mechi hizi hakikisha kipindi kinachokuja unaandaa mechi nyingine baina ya watumishi wote na wananchi wa kawaida ili tuweze kuendeleza na kujenga mahusiano na ushirikiano mzuri baina ya jamii inayotuzunguka.” Alisema Ndugu Mbilinyi.

Timu ya Watumishi wa Makao Makuu

Timu ya Walimu Wakuu

Mwalimu Rodrick Francis kutoka shule ya sekondari Mwibara aliweza kuipatia timu yake ya walimu Wakuu bao la kwanza katika dakika ya pili, kipindi cha kwanza, huku goli la pili likifungwa na mwalimu Isack Sore wa shule ya msingi Ibwagalilo katika kipindi cha pili, dakika ya 87.

Kwa upande wa timu ya Watumishi wa Makao makuu, Ndugu Phinius Ouko aliipatia timu yake ushindi kwa kufunga goli moja, katika kipindi cha kwanza, dakika ya 38.