HALMASHAURI ZATAKIWA KUPELEKA SHERIA NDOGO KATIKA BARAZA LA MADIWANI KWA AJILI YA KUJADILIWA NA KUPITISHWA.

Posted on: January 23rd, 2025

Mwenyekiti wa Kamati ya lishe ya Wilaya Mh. Dkt. Vincent Anney siku ya tarehe 23/1/2025 aliongoza kikao cha tathimini ya lishe kwa ngazi ya Wilaya kwa kuagiza Sheria ndogo zote zilizotungwa na vijiji, pamoja na mitaa kuhusiana na uchangiaji wa chakula shuleni, kuhakikisha zinapelekwa kwenye mkutano wa Baraza la madiwani kwa ajili ya kujadiliwa na kupitishwa kwa ajili ya kuanza kwa utekelezaji wake rasmi.

Rai hiyo ilitolewa katika kikao kilichofanyika katika ukumbi wa mikutano uliopo Halmashauri ya Bunda Mji, ambapo ulikutanisha idara mtambuka zinazoshughulika na lishe pamoja watendaji wa Kata na mitaa kutoka Halmashauri zote mbili.

Mh. Dkt Anney alisema, tuendelee kutoa elimu Kwa jamii na wazazi kuendelea kuchangia chakula shuleni, na tusichoke kuendelea kutoa elimu ili jamii iweze kuona umuhimu wa kuchangia chakula shuleni na watoto waweze kupata lishe kuanzia madarasa ya awali hadi Sekondari.

Mwenyekiti alihitimisha kikao Kwa kuwaagiza watendaji wote wa Kata na mitaa kuhakikisha wanafuatilia wanafunzi wote waliochaguliwa kujiunga na kidato cha kwanza wanafika shuleni kwa ajili ya kuanza masomo.